تجربة شخصية في الأحوال الشخصية القبطية

[م /الدخاخني]

بسم الله الرحمن الرحيم والحمد لله رب العالمين
وبعـــــــــــــــــــــــد


مقدمة :

توقفنا طويلا أمام تلك الرسالة وكيفية معالجتها صحفيا , بما في ذلك قرار نشرها من عدمه .. بعد أن هالنا ما فيها من اتهامات بفساد أخلاقي وديني . نربأ برجال كنيستنا القبطية أن يقعوا فيه !
انحزنا لقرار النشر علي مسئولية صاحب الرسالة لما تمثله من أهمية وتفاصيل تجربة شخصية لأزمة الأحوال الشخصية المزمنة في الكنيسة الأرثوذكسية , وفيها يقدم تجربته مع المجلس الإكليريكي وما فيه من فساد وتحكم في مصائر الأقباط – علي حد قوله !!
بخلاف ذلك فإن الرسالة تطالب الكنيسة بالإجابة عن السؤال الصعب وهو كيفية إثبات الزني علي أحد الزوجين لوقوع الطلاق ؟؟؟
وقد تدخلنا لحذف الأسماء المذكورة فيها وعناوينهم التفصيلية ... وقد احتفظنا بأصل الرسالة التي حرصنا علي نشرها كما كتبها صاحبها بدون تدخل منا رغم أن معظم عباراتها بالعامية . إن رغب مسئولو الكنيسة في الحصول علي أي معلومات إضافية ..... ومرة أخري نؤكد هدفنا ليس إثارة وإشعال الفتن بقدر ما نحاول أن نجد إجابات من الكنيسة القبطية علي ما تثيره هذه الرسالة المثيرة من تساؤلات !!
روزاليوسف

[م /الدخاخني]

بسم الله الرحمن الرحيم والحمد لله رب العالمين
وبعــــــــــــــــــــــد

. مطلقتي الزانية تزوجت كنسيا وأنا المجني عليه ممنوع من الزواج :
(( اسمي ( إدوارد ) كنت أعمل موظفا بجامعة طنطا قبل أن أهاجر إلي أستراليا . وقصتي تبدأ في ليلة زفافي عندما اكتشفت أن زوجتي ليست بكرا والأخطر أنها كانت تمارس الدعارة هي وأمها وأختها وأخواتها الصبيان هم اللي بيوصلوا الزبائن . وطبعا لأن الأسرة بالكامل بتعمل كدا . وكل شيء بإرادة الأم فأتقنوا التمثيل علي في فترة الخطوبة , فلم أكتشف الأمر غير ليلة الزفاف , ورغم الصدمة قلت لها أنا مش ها عمل حاجة بشرط تحكيلي كل حاجة بصراحة , وأقنعتها وسجلت إعترافاتها علي 4 شرائط في ثلاث أسابيع , ثم قمت بطردها وذهبت إلي المطرانية لكي أطلقها وقدمت المستندات ...
هناك قالولي إحنا عندنا الجواز في الكنائس والطلاق في المحاكم . وطلبوا مني أروح المحكمة لكي أطلقها أولا . وبعدين أعود للكنيسة لآخذ تصريح زواج .
وفعلا نيافة الأنبا ( بولا ) رئيس المجلس الإكليريكي للأحوال الشخصية – سمع الشرايط بنفسه قدامها وبحضور أخوها إللي كان طالب في كلية الطب وقتها , وناقشها هي وأخوها في كل ما قالت ثم أخذ عليها إقرار كتابي بأن هذه الشرائط بصوتها , وإنها قالت هذا الكلام بمحض إرادتها – أصل الشرائط موجود عندي للآن سلمت نيابة الأنبا بولا نسخة من هذه الشرائط ثم حفظهم في ملف القضية في المجلس الإكليريكي , ثم أخذ عليها هذا الإقرار اللي أنا أخذت منه صورة مازالت موجودة معايا وأصل الإقرار حفظ بملف القضية .
المهم أن القضية استمرت في المحاكم المدنية إلي أن حصلت علي حكم الطلاق النهائي في محكمة
طنطا ومحكمة الاستئناف التي لم تعترف بالتسجيلات الصوتية دون إذن من النيابة ولكنها حكمت بالطلاق لسبب آخر وهو الفرقة أكثر من ثلاث سنوات بعد أن أضعت من عمري خمس سنوات لأحصل علي حكم الطلاق النهائي , ثم قضت الكنيسة ببطلان الزواج أي أن هذا الزواج باطل من أساسه لثبوت غش في البكارة في ليلة الزفاف نتيجة سوء السلوك , والمحكمة المدنية حكمتلي بالطلاق لنشوزها .
وفي اليوم التالي بعدما حصلت علي حكم الطلاق النهائي من محكمة الاستئناف حصلت علي تصريح الزواج الخاص بي من المجلس الإكليريكي في طنطا عليه توقيع الأنبا (بولا ) لأفاجأ بما هو أبشع من خلال كاهن هو عضو بالمجلس الإكليريكي في طنطا .
يوم ما أخذت تصريح الزواج من المجلس الإكليريكي كان هذا الكاهن قاعد علي مكتب المحكمة الإكليريكية في مطرانية طنطا وتجلس بجواره السيدة التي طلقتها , والملف بتاع القضية موجود قدامه , قالي قدمها : أنت مش خلاص طلقتها وطلعت التصريح ؟ إبقي قابلني لو أتجوزت تاني .
ثم أفاجأ أنه أعطاها ملف القضية فأخرجت منه الإقرار اللي وقعت عليه أمام الأنبا بولا قطعته قدامي وأنا أتحدي أي مسئول يجيب هذا الإقرار أو هذا الملف ثم حصلت علي تصريح زواج من المجلس الإكريليكي بطنطا وتزوجت في الكنيسة الأرثوذكسية في طنطا بعقد زواج مسيحي أرثوذوكسي رغم قرار قداسة البابا بأن مثل هذه المرأة لا تتزوج مرة أخري في الكنيسة .
كل هذا يثبت أن قرار الدولة بإلغاء المحاكم الملية متنفذش , فقط غيروا أسمه من ( المحكمة الملية ) إلي ( المجلس الإكليريكي ) والأخير عبارة عن إثنين أو ثلاثة من الكهنة يجتمعوا ويحكموا علي كل من يحصل علي حكم طلاق من المحكمة المدنية إذا كان يتجوز ثاني ولا لاء .
إذا الكنيسة لم تنفذ قرار الدولة بإلغاء المحاكم الملية .دي نقطة أولي .
النقطة الثانية : قرار قداسة البابا ما بيتنفذش ولم يشفع لي حصولي علي الطلاق لعلة الزني والشرائط والإثباتات والإقرار والاعترافات أمام الأنبا بولا .
المهم خدت تصريح جواز في مدينة طنطا لحد هنا بالنسبة ليا مفيش مشكلة كونهم يخالفوا قرارات الدولة وقرارات قداسة البابا . كونهم يخالفوا العقل والضمير كل ده مش مشكلة بالنسبة ليا , حتى إنها تتجوز تاني فهذا حقها وأنا لي وجهه نظر في هذه النقطة , فكون أن الإنجيل قال ( لا طلاق إلا لعلة الزني ) مش معني كدا , إنهم يشكلوا محاكم للناس أحسن حد يخالف الإنجيل ويطلق لعلة غير علة الزني , طيب ماهو الإنجيل قايل حاجات كتير, يعني مثلا قال ( لا تكذب ) يقوموا يشكلوا محاكم للناس أحسن حد يكذب ويخالف الإنجيل ؟؟ هنا كل إنسان مسئول عن نفسه دي نظريتي أنا الشخصية والعقلانية وهاثبتلكم أن العالم كله ماشي علي هذا الكلام .
إن كل إنسان مسئول عن نفسه يخالف الإنجيل فربنا هايحاسبه مش الكنسية ولا أبونا ولا الأنبا ولا أحد , المشكلة الحقيقة ما يحدث نتيجة الإجراءات اللي عاملاها الكنيسة طبعا , تصريح الزواج الذي يستخرج من المجلس الإكليريكي هو عبارة عن ورقة عادية جدا أي واحد يكتبها علي إيده , يعني مش تصريح له شكل معين معترف بيه علي مستوي جميع الكنائس وصادر عن البطريركية لجميع الكنائس له رقم number reference ويكون مكتوب مثلا علي ديل التصريح مطبوع بصيغة موحدة لجميع الكنائس لمن يريد الاطمئنان لمصداقية هذا التصريح يتصل بالمركز الرئيسي لهذه التصاريح ورقم تليفون كذا وعنوانه كذا ومواعيده كذا ,
طبعا مفيش هذا الكلام يعني تصريح الزواج بتاعي كمثال عبارة عن ورقة في حجم كف اليد أي حد يكتبها علي إيده . طبعا كل كنيسة بتكتب بطريقتها , كل كاهن بيكتب حسب عقليته وحسب نفسيته , يعني أنا تصريح الزواج بتاعي مكتوب فيه (( صرح لفلان الفلاني بالزواج بالكنيسة والأنبا بولا موقعيصرح لمدة عام .)) وها نتكلم في مسألة ليه بيكتبوا لمدة عام , لأن لديهم تعليل غريب لتحديد المدة هو ( علشان ما يتجوزش غير مرتين ) طبعا هذا رد ساذج . هما بيكتبوا لمدة عام كنوع من الإذلال والتذلل للكنيسة بحيث يضمنوا أن الشخص ده يكون في أيديهم مدي الحياة يضطر يروح لهم كل سنة .
يعني أنا هنا في استراليا عشان أجدد التصريح بتاعي لازم أنزل مصر وأجري ورا الأنبا بولا شهرين علشان يكتبلي كلمة يصرح فهذا نوع زي ما قال الإنجيل ( يصطادون البائسين في البلاد المكسورة لم يجبروه والمطرود لم يستردوه بل بشدة وعنف تسلطوا عليه ) . فهذا نوع من السيطرة عليه لو فيه شفافية كانوا عملوا مركز لهذه التصاريح في القاهرة ورقم تليفون يكون مذكور وعنوان ومن يريد أن يتقدم إلي هذه الجهة ليعرف أي معلومات عن هذا التصريح .
مشكلتي أنا واخد التصريح بتاعي من مطرانية طنطا وعليه توقيع الأنبا بولا , طيب لما أتقدم لواحدة في محافظة تانية في أسيوط ولا الإسكندرية هي لا تعرف هل دا تصريح فعلا المجلس الإكليريكي أم لا ؟؟؟ لهذا سوف تضطر تسافر لمطرانية طنطا علشان تسألهم التصريح ده حقيقي ولا لاء ؟؟؟ مين اللي هايقبلها هناك ؟؟؟ المسئول عن الأحوال الشخصية قاعد 24 ساعة في المطرانية يبيع ويشتري في الزباين اللي بييجوا , وهو مسئول المجلس الإكليريكي في طنطا , وهو قاللي أبقي قابلني لو أتجوزت ثاني , فهو عارف اللعبة وبقاله 20- 30 سنة بيلعبها ,
المهم تروح تسأله ( التصريح ده حقيقي يا أبونا ) هو طبعا عارف إسمي أول ما يشوفه يقولها ( لا يا بنتي دا شخص ممعهوش تصريح .
أنا معايا تصريح من الأنبا بولا من ثاني يوم بطلان الزواج وشرائط تسجيل وفيديو والحكم ولكنه يقولها ( يا بنتي دا ممعهوش تصريح حتي تعالي أوريكي قرار البابا بأن في حالة الطلاق اللي بيثبت عليه علة الزني مبيخدش تصريح زواج , طيب اللي هو طلقها أسمها( ..... ) أتجوزت وعقد جوازها أهو فدا دليل أن هو ممعهوش تصريح .
شوفوا بقي الكنيسة طلعتني إيه في الآخر طلعتني عاهر رغم إني أنا المظلوم , وأنا اللي معايا تصريح زواج طلعوني نصاب ومطلقتي الزانية طلعت شريفة عفيفة .
هذه نتيجة المجلس الإكليريكي والمحاكم الكنسية , هل هذا من حقوق الإنسان , وهل الحكومة المصرية تقبل هذا ؟؟؟؟؟
هل هذه المحاكم دستورية ؟؟ كيف تحكم محاكم علي الناس من يتزوج ومن لا يتزوج ؟؟؟
كيف يتحكم كاهن جاهل في أن يتزوج هذا ولا يتزوج ذاك ؟؟؟؟.
والأنبا بولا مش قادر يعمل حاجة دا زميل في الشغل . أنا قطعت تصريح الزواج بتاعي مرتين قدام الأنبا بولا نفسه .
كيف يا قداسة البابا المعظم واحد زيي يضيع من عمره خمس ست سنين في المحاكم علشان يطلق وخمس ست سنين زيهم مش عارف يتجوز .
نفسي يا قداسة البابا تقولي لما أنت وضعت هذا القانون , (( لا طلاق إلا لعلة الزني )) إزاي الناس ها تثبت هذه العلة ؟؟؟ دي مباحث الآداب ومديرية أمن بالكامل متعرفش تثبت مين اللي زني ومين اللي لا ؟؟؟؟ يبقي إزاي علي الزوج المقهور اللي مراته خانته وغشته هايثبت هذا للمحكمة . والمحكمة ما بتخدش بأي كلام لازم يكون ضده حكم بالزني علشان المحكمة تحكم بالطلاق .
في أحد البرامج المذيعة سألت أبونا علة الزني دي بيثبتوها ؟؟؟؟
قال : إذا شوفتها راكبة تاكسي مع واحد ..دا كلام مصاطب لامؤخذه .. فيه محكمة ها تعترف بهذا الكلام ؟؟؟
الأبشع من ذلك أنه في برنامج اسمه ( جوا البيت ) المذيعة بتسأل الأنبا بولا بتقوله يا أبونا علة الزني بيثبتوها إزاى ؟؟ قالها يشوف الموبايل بتاعها مين اللي بيتصل بيها علي الموبايل هل هو لو خد رقم من الموبايل اللي بيتصلوا بيها وراح المحكمة يرفع قضية طلاق . القاضي ها يحكمله عشان الرقم دا اتصل بيها ؟؟؟؟
فالمذيعة سألته : طيب الحالة اللي قدامي بتقول أن الزوجة بتزني مع واحد ساكن في الشقة اللي قدامها في نفس البيت والزوج مش عارف يثبت إزاي ؟؟؟
قالها يستخبي تحت بير السلم ويشوفهم بتدخل عنده الساعة كام ويجي يقولي وأنا أبعت حد من الكنيسة يشوف إيه الموضوع دا . هل هذا يعقل ؟؟؟ هل هؤلاء هم المسئولون في الكنيسة الذين سيقولون من سيتزوج ومن لا ؟؟؟ وها هي نتيجة المحاكم الكنسية أي المجلس الإكليريكي .
لقد كان للدولة مليون حق في إلغاء هذه المحاكم الملية , ولابد من إبعاد الكنيسة تماما عن مسائل الزواج والطلاق , وأنا أصرخ علي المسئولين . لا أطلب شيئا سوي تنفيذ قرارات الدولة كاملة قرار الدولة الصادر عام 1955 بإلغاء هذه المحاكم الملية ويكون كل شيء تحت يد المحاكم المدنية فقط .
والكنيسة تكون عبارة عن مكان عبادة فقط , ملهاش دعوة مين أتجوز ومين لا . زي الجامع , هل الشيخ في الجامع بعد ما بيخلص صلاة الجمعة بيدخل يقعد في المكتب في جهاز تكييف وسكرتارية بره وبودي جارد وصف سيارات واقف بره والناس تقف تتحايل عليه وعاوزين تدخل تقدم له طلب علشان يقرر مين يتجوز ومين لا . وهو يكتب يصرح أو ل يصرح !!!!!!!
الكنيسة والجامع مكان عبادة فقط , السؤال المهم : في روما والفاتيكان بيتجوزوا إزاي .؟؟؟؟؟
جميع الكنائس وجميع الدول الأوربية والأمريكية والأسترالية وجميع الدول المتحضرة لا تعترف بعقود زواج الكنيسة . جميع الزواج هو زواج مدني , يتم في جهة تشبه الشهر العقاري , متخصصة في إبرام عقود الزواج والطلاق التابعة لوزارة العدل . زى المأذون ماهو تبع وزارة العدل وموظف في وزراة العدل ملهوش دعوة بالجامع , دي حاجة تخصه بينه وبين ربنا .
الجامع ملهوش دعوة بالزواج والطلاق . نفس الشيء هنا في إستراليا بالمناسبة انا عشت وزرت 5 دول أوربية و9 دول عربية مفيش دولة أوربية بتعترف بعقد زواج الكنائس . وهنا في أستراليا أيضا الطرفين بيتزوجوا ويتطلقوا مدنيا أمام الدولة طبقا للقوانين المدنية . كونهم يروحا الكنيسة بعد كدا , دا حسب كل واحد وعلاقته بربنا الكنيسة ملهاش دعوة بيه , ومن حق كل إنسان يتجوز ويطلق إن شالله 100 مرة ربنا هو اللي ها يحاسبه إذا كان طلق لعلة الزني أو لغيرها ربنا هو اللي ها يحاسبه .
طيب أنا هنا نفسي أسأل قداسة البابا سؤال : لما إحنا متمسكين بالإنجيل وبكلام الإنجيل بالحرف , ما الآية واضحة وصريحة جدا اللي بتقول ( يجب أن يكون الأسقف بلا لوم بعل إمرأة متزوج وله أبناء ) الأسقف راهب ملهوش دعوة بالزواج والطلاق ولا عمره فكر فيه وساب الدنيا كلها وراح الدير يتعبد يجيبوه ويعملوه أسقف بقي منافس للسيد المحافظ ساكن في فيلا قدام فيلا السيد المحافظ وسكرتارية وصف عربيات وكأنه في موكب رئيس الجمهورية ويكون محجوز له عربية في المطار وطيارات تنقله لأوربا وأمريكا والحسابات كلها بقت بالدولار والإسترليني , طبعا ساعتها مش هيهمه يقعد في أبرشية ويشوف المشاكل .
أنا ها أتكلم عن نموذج المحكمة الإكليريكية في طنطا تشكيله إزاي ...
مطرانية طنطا كان فيها 3 كهنة ويقولا الآن 4 ......
الاول هو الكاهن اللي إتكلمت عنه من قبل , والكاهن الثاني زميله في نفس المجلس أسمه ( ..... ) وهو أكبر تاجر في جثث الأموات وفي المقابر ومعروف بأنه حقق الملايين من المقابر وتجارتها وجثث الأموات . الكاهن الثالث في نفس المحكمة , أكبر تاجر في العفاريت معروف كويس جدا أسمه ( ..... ) بيدعي إنه بيطلع العفاريت والشياطين من الناس , ومعروف عند كل المسيحيين والمسلمين اللي عاوزة تعمل عمل اللي عاوزة تفك عمل اللي عاوزة تتجوز اللي عاوزة تنتقم من جوزها بتروح لهذا الكاهن ,
وسبق أن قام بضرب إثنين كهنة كل ما يجيبولوا كاهن في الكنيسة معاه يضربه .
الكاهن الرابع يسافر أوربا وأمريكا ويشيع بين المصريين والمسيحيين في الكنائس هناك ......
ولدي إثباتات بهذا الكلام ... إن في اضطهاد ديني في مصر , ويجمع فلوس من المصريين في أمريكا إنه لحالات معينة في مصر نتيجة الاضطهاد , ويأخذ الفلوس دي له ويعلن في الكنيسة أن البابا شنودة بعته يحل مشاكل في أمريكا , وإختاره هو دونا عن العالم كله يروح يحل مشاكل .
هذا كذاب , بيروح يجمع فلوس وتبرعات يحطها في جيبه ويشيع أنه راجل مهم وراجل دين وعامل عملية غسيل أموال بيطبع كتب قديمة وبيبعها . هي ما بتتباعش أساسا بياخدها يوزعها ببلاش علي الشباب في الكنيسة ويقول أن الملايين اللي جاتله دي نتيجة تجارة الكتب , والكتب دي محدش بيشتريها ده بيوزعها ببلاش , والملايين والشقق بيغيرها كل سنة من الفلوس اللي بيجيبها من بره . أسمه ( ...... ) وأنا أقول هذا الكلام علي مسؤوليتي .
هل هذه محكمة تحاكم الناس وتقول مين اللي يتجوز ومين اللي مايتجوزش؟؟؟؟
والنتيجة ..واحد زيي مظلوم , معاه الأدلة اللي بصوت مطلقته وصورتها وخطها التي تثبت زناها , وفي الآخر هي اللي أتجوزت وطلعت هي الشريفة وطلعت أنا المزور والكذاب .
هل هذه محكمة , نفسي يا قداسة البابا تقولي فين اللوائح التي تنظم عمل هذه المحاكم , يعني الدولة لما بتلاقي أي حد لابس بدلة وكرافته تقوله تعالي نعملك قاضي ؟؟؟ القاضي ده له شروط ودراسات وأسس وعليه رقابة وتفتيش , إحنا عندنا الكنيسة فين الشروط واللوائح يا قداسة البابا التي تنظم العمل في هذه المحاكم ؟؟؟ مين اللي ها يجيبلي حقي ؟؟؟؟
لو كان اللي خالف وخد حقي موظف في الدولة كنت رفعت قضية علي الدولة وأخذت حقي , إنما في الكنيسة ها أرفع دعوي علي مين . من حق أي إنسان إنه يتجوز ويطلق راحته ودا صح طبعا , لكن قداسة البابا بوظ الموضوع وقالك يجب أن يطاع الله أكثر من الناس , تشوف الله قال إيه بقي (( يا شعبي مرشدوكم مضلون ويبتلعون طريق مسالكك , قال " هؤلاء يخدمون يسوع المسيح بل بطونهم وبالأقوال الحسنة يخدعوك )) (( تأتي ساعة يظن فيها كل من يخطركم أنه يقدم خدمة من الله , يسمون خدام الله يأكلون ثروة الأمم وعلي مجدهم يتآمرون )) لأن من صغيرهم إلي كبيرهم كل واحد مولع بالربح وعن أقصي ومن النبي إلي الكاهن كل واحد يعمل بالكذب هؤلاء من قال عنهم الإنجيل , وبالمناسبة من صغيرهم لكبيرهم في سفر أرميا إصحاح 3 آية 29 لأن من صغيرهم لكبيرهم مولع بالربح عن أقصي ومن النبي إلي الكاهن كل واحد يعمل بالكذب .
أنا لفيت في 9 دول عربية و5 دول أجنبية , الدولة الوحيدة التي تعفي رجال الدين المسيحي من الضرائب هي مصر , يمكن ما يعفوش رجال الدين الإسلامي , لكنها تعفي رجال الدين المسيحي من الضرائب رغم أنهم يدخل لهم ملايين الملايين .
أحكي حكايتي أمام العالم كله , وهي موثقة للعالم كله وأضعها أمام قداسة البابا لكي يعرف الجميع أن الكنيسة ظالمة ولكي يحقق بنفسه في الفساد اللي في الكنيسة والضياع اللي في الكنيسة .
يا قداسة البابا أنت حبيبي وأنا أعترف إنك بذلت حياتك كلها في خدمة الكبير والصغير ولم تترك صغيرة أو كبيرة إلا وأعطيتها حقها . لكن نسيت أهم حاجة , الكهنوت يا سيدنا , واعذرني الكهنوت بايظ خالص , الكهنة غير مؤهلين نهائيا للحكم علي الناس , مش عارفين يعني إيه حقوق الإنسان .

أدوارد توفيق

المصدر :
المصدر / مجلة روزليوسف / العدد رقم (4212) الصادر يوم السبت الموافق 28/2/2009 ص 80

أو

http://www.rosaonline.net/alphadb/article.asp?view=5037

[احمد الصياد]

ياريت نشوف تعليق من النصارى على الكلام ده
وصحيح ازاى يتم اثبات الزنى على الزوجة ا الزوج
ياريت حد فيهم يوضح

[elmohager]

لا اله الا الله ------- اشهد ان لا اله الا الله وان محمدا رسول الله

[elmohager]

بسم الله الرحمن الرحيم ----- السلام عليكم ورحمة الله وبركاتة .. اولا ابدا بسلامى وتحياتى الى الاخوة والاخوات والله الذى لا اله الا هو احبكم فى الله والله انكم حقا حراس العقيدة وتجتهدون حقا فما تأنيتم لحظة فى جهادكم لاسبات الحق... ولكن لى عتبآ عليكم خاصا المشرفيين لاننى امس كنت اتصفح هذا المنتدى المبارك ووجدت هذا العضو المدعوا ( مستنير ) مع انى اراه عكس ذلك يتبجح ويلقى تهم باطلة على بعض اخواننا الاساتذة الكرام والادهى من ذلك ما كان موجودا بين السطور فكانت تحمل اهانات وتلاعب بللافاظ ومحولاتة للفتنة بينكم وعتبى عليكم ان تركتموه يتمادى والذى لا اله الا هو انه لا يستحق ابدا ابدا ان ياخذ كل هذا الكرم من فضيلتكم كما وجدته ايضا مصر على استفزازكم بهذا الاسلوب الرخيص الوقح ويتمادى فى ذكر هذة الكلمات المعروف مخذاها من مثل هذه الاشخاص المريضة ( صباح كذا ومساء كذا ) اعلموا يا اخوانى اعزكم الله ان العبد الفقير الى الله يعرفهم جيدا فاعيش تقريبا بينهم واعلم عن اساليبهم الكثير ليس على النت فحسب بل فى الواقع...

[ظل ظليل]

[align=right]

الدولة الوحيدة التي تعفي رجال الدين المسيحي من الضرائب هي مصر , يمكن ما يعفوش رجال الدين الإسلامي , لكنها تعفي رجال الدين المسيحي من الضرائب رغم أنهم يدخل لهم ملايين الملايين .

واعذرني الكهنوت بايظ خالص , الكهنة غير مؤهلين نهائيا للحكم علي الناس , مش عارفين يعني إيه حقوق الإنسان .

وشهد شاهد من أهلها..........
[/CENTER]

[مهندس بشر]

أنا من طنطا ونفسي أعرف الكهنة بتوع تجارة الجثث وبتوع العفاريت دول
الله بلعنهم دنيا وآخره

[م /الدخاخني]

بسم الله الرحمن الرحيم والحمد لله رب العالمين
وبعـــــــــــــــــــــــــــــــــــــــد

[ayatmenallah]

بسم الله الرحمن الرحيم
السلام عليكم ورحمة الله وبركاته

بارك الله فيك استاذنا
م /الدخاخني

{أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللّهِ حُكْمًا لِّقَوْمٍ يُوقِنُونَ}
(50) سورة المائدة