فن إيتاء الزكاة والصدقات >> بتعمل كدة ؟ والا لأ ؟

تقليص

عن الكاتب

تقليص

( رحمة ) مسلمة اكتشف المزيد حول ( رحمة )
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • فن إيتاء الزكاة والصدقات >> بتعمل كدة ؟ والا لأ ؟



    السلام عليكم ورحمة الله وبركاته
    منقول عن /
    Ahmed Mostafa Mosleh

    عايز أقول حاجة .. خارج الصندوق خالص ..
    عن موضوع التبرعات والإعلانات والرسايل:

    - كل سنة الناس بتسأل نفسها:
    ابعت رسالة فاضية ع الموبايل؟ .. ولا ابعت فلوس على حساب بنكي؟ .. ولا اعمل ايه؟

    - حاقولك .. وعن تجربة أشخاص أعرفهم ..
    بس بعد إذنك خليك مع الكلام للآخر:


    ** اطلع على مستشفى أبو الريش للأطفال .. محطة مترو السيدة زينب ..
    حتلاقي حوالي أربع أو خمس وحدات رعاية مركزة .. متوزعة على الادوار كلها
    رعاية قلب .. رعاية مبتسرين .. رعاية ما بعد الجراحات .. وهكذا

    - حتلاقي أطفال عمرهم شهور أو حتى أيام ..
    إسأل على النايب النبطشي .. وشوف أكتر طفل موجود محتاج علاج .. وأهله مش قادرين يشتروه
    - اولا .. النايب من تعامله .. ومن سنين النيابة .. ومن سنايره ..
    عارف يفرق كويس بين المريض المحتاج .. والمريض المدعي

    - ثانيا .. حتلاقي اطفال ليهم أمبولات حقن .. ال**** بتوصل من ١٠٠ ل ٣٠٠ جنيه .. او حتى أكتر ..
    وممكن حتى بخمسين جنيه يوميا .. بس أهل الطفل جم بيه جري .. ومعهمش تمن علاجه اليومي!
    وغالبا العلاج ده مهم جدا ليهم Life saving
    - خلي النايب يكتبلك اسم امبول واحد فيهم في ورقة ..
    واطلع على صيدلية "علي وعلي" .. في شارع القصر العيني ..
    جنب أبو الريش بحوالي ١٥٠ متر ..
    أو أي صيدلية كبيرة .. زي أقرب فرع للعزبي أو سيف أو غيرهم ..
    الطبيب النايب .. حيكون عارف مكان تواجد الأدوية دي ..
    لأن غالبا الادوية دي بتكون نادرة .. ومش متوفرة غير في الصيدليات المخصوصة

    - اشتري أمبول او اكتر .. حسب قدرتك المالية ..
    وارجع إديه للنايب ..

    - ولو ظروف التعقيم تنفع .. إستأذن النايب .. وخلي التمريض توريلك مكان الطفل .. اللي غالبا في غيبوبة وعلى أجهزة ..
    وروح أقف على طرف سريره ..
    وادعيله ..
    ربنا يعافيه .. ويشفيه .. ويرجعه لأهله سالم ..
    ويقر عينهم بيه

    ** خلصت؟


    اطلع على قسم الحسابات ..
    حسابات المرضى القسم الإقتصادي ..
    ده غير القسم المجاني

    حتلاقي بردو المحاسبين شاطرين .. عارفين مين مقتدر ومين لأ
    اسألهم على اكتر طفل اهله متأخرين في دفع حسابه .. ومش قادرين
    ممكن تلاقي حسابه ده .. ١٠٠ جنيه او ٢٠٠ .. أو أكتر ..
    سدد حسابه .. وخد وصل الدفع .. وإتأكد إنه إتسجل في حساب المريض


    ** الحدوتة دي ..
    ممكن زي ما تقدر تعملها في "أبو الريش" ..

    تقدر تعملها في رعايات "القصر العيني" .. أو "الدمرداش" أو "الحسين الجامعي"
    أو حتى في الأقسام الداخلية .. العادية والجراحية



    *** حتستفاد ايه؟ .. وايه الفرق عن غيرها؟

    - الصدقة المباشرة من غير وسيط ..
    اللي حتوصل للمريض كاملة

    - الدعاء عن ظهر غيب للطفل اللي حتدعي له بالشفاء .. وانت شايفه على سريره لا حول له ولا قوة
    - رجليك اللي خطت المشوار كله .. اللي مش حياخد أكتر من ساعة لساعتين
    - رقة قلبك من قسوة الدنيا .. لما تعيش الساعتين دول عشان ربنا
    - إخلاصك .. وصدق نيتك .. في إن انت متعرفش ولا واحد من اللي انت ساندتهم ..
    ولا هم يعرفوك .. ولا حتى حيشوفوك

    - فرحة قلب أهل .. لما يزوروا ابنهم الرضيع .. ويعرفوا إن حد شال من على ضهرهم حمل العلاج ومصاريفه ..
    وهم اصلا جريوا ع العلاج المجاني .. عشان عجزهم المادي لده ..
    ودعاهم ليك عن ظهر غيب .. وبصدق

    - رفع ربنا عنك لكل بلاء وإبتلاء .. بصدق نواياك .. وحسن توجهك
    ** شوفت النوايا الطيبة اد ايه ..
    شفت حصيلة الساعتين دول اد ايه



    - على فكرة ..
    ارقام رسايل الموبايل بتاعت "رسالة" ومستشفى السرطان .. او حتى ابو الريش

    معروف طبعا إن "الدعاية" بتاخد منها نسبة كبيرة من التبرعات .. عشان تغطي ع الإعلانات
    - كمان الرسايل نسبة منها ولو صغيرة جدا .. بتروح لشركات المحمول
    و دي كلها .. معمولة لستات البيوت الكبار في السن .. اللي نفسهم تواقة للصدقة .. ومش لاقيين مكان ليها ..
    فيبعتوا رسالة بقيمة الصدقة .. لرقم المستشفى

    - لكن انا وحضرتك .. واللي زينا ..
    سهل جدا علينا .. نعمل الحدوتة دي .. ولو مرة في الشهر ..
    مش في رمضان بس



    ** طب أنا عرفت منين؟
    أي دكتور أخد سنين نيابة [تدريب] في المستشفيات الجامعية .. يعرف كويس قيمة الكلام اللي كتبته في البوست ده

    وسنة ٢٠٠٧ كنت في قسم ١٦ رمد .. في القصر العيني ..
    النايب المسؤول عن تحضير مستلزمات العمليات لمرضى العلاج المجاني ..
    لمدة ٨ شهور ..
    وبعدهم شهرين في قسم الرمد .. بمستشفى أبو الريش الياباني للأطفال ..

    وفي قسم ١٦ .. كنا بنلاقي ستات ورجالة فوق السبعين ولادهم سالفين حق تذكرة القطر .. عشان ييجوا يعملوا ليهم عملية في عينهم ..
    وممكن أعمل تاج لعشرات الدكاترة زمايلنا .. اللي عايشين وسط الحياة دي ..
    وأنا مستني تعليقاتهم على البوست ده .. يكملوه بخبراتهم وآراءهم

    - دي حدوتة كل سنة .. وكل رمضان ..
    ابدأ من دلوقتي ..
    ممكن تروح بكره او بعده ..

    قول لزمايلك ع الفكرة .. بس روح لوحدك ..
    روعة احساس صدقة السر .. افضل ١٠٠ مرة
    نفوسنا اضعف من تحايلات الشيطان على الرياء والسمعة .. عشان يفسد اعمالنا
    واعجابنا بنفسنا لما نعمل حاجة كويسة .. ممكن يضيع ثوابها!


    ** مشوار واحد من ده ..
    ممكن يكون الوحيد .. اللي ينجي رقابنا من النار ..
    وممكن تطيح بيه كل صحائف سيئاتنا ..
    ويرضى عنا ربنا

    رمضان كريم

    {وَالَّذِينَ كَفَرُوا بَعْضُهُمْ أَوْلِيَاءُ بَعْضٍ إِلا تَفْعَلُوهُ تَكُنْ فِتْنَةٌ فِي الأَرْضِ وَفَسَادٌ كَبِيرٌ}
    ـــــــــــــــــــــــــــ

  • #2
    رد: فن إيتاء الزكاة والصدقات >> بتعمل كدة ؟ والا لأ ؟


    أنس حسن

    مفهوم الصدقة "السهلة" بدأ يطغى على مفهوم التعاون الحقيقي ومعونة الناس.. انك تبعت صدقتك برسالة قصيرة او بالاتصال على رقم بتزيد العزلة بينك وبين المحتاج.. وبتزيد فكرة الفصل بين الطبقات.
    فكرة انك تدور على شخص تساعده تشوف هو محتاج ايه .. ده أمر يتجاوز الصدقة المالية السريعة..

    فكرة انك تنتشل شخص من أزمة ممكن طريقة تفكيره فيها هي السبب مش مجرد الورطة المالية..

    إنك تدل شخص على طريق تعلم وشغل ممكن يسد حاجته بعد فترة وتاخد بإيده وتتابعه..
    إنك تدور على حد بيتعالج من مرض مزمن وتتابع بنفسك مراحل العلاج وتتحمل تكاليفها كلها أو جزء منها..


    الصدقة متعملتش عشان نزيد العزلة بين الطبقات وانما عشان نحس ببعض ونقرب من تفاصيل بعض.. والصدقة ليست فقط في المال وإنما في العلم والجسد والذكاء والقدرات الاجتماعية والنفوذ ..

    فكر تقرب أكتر من المحتاج بدلا انك ترميله فقط الجنيه ولا العشرة.. وفكر تحل مشكلة ليه وتدخل في تفاصيلها أهم من انك تسكنه ببعض المال وخلاص

    {وَالَّذِينَ كَفَرُوا بَعْضُهُمْ أَوْلِيَاءُ بَعْضٍ إِلا تَفْعَلُوهُ تَكُنْ فِتْنَةٌ فِي الأَرْضِ وَفَسَادٌ كَبِيرٌ}
    ـــــــــــــــــــــــــــ

    تعليق


    • #3
      رد: فن إيتاء الزكاة والصدقات >> بتعمل كدة ؟ والا لأ ؟

      بسم الله الرحمن الرحيم
      السلام عليكم ورحمة الله وبركاته
      جزاك الله عنا خير اختي الفاضلة سماح
      وأثابك الله الفردوس الاعلى
      ونسأل الله سبحانه ان يتقبل منا ومنكم صالح الاعمال .
      حرر بواسطة مريم، صاحبة الخبرة في مجال إختيار رجيم الكرش و مساعدتكي في إختيار تغدية المراة الحامل وكل مايخص إختيار افضل حليب للرضع بالنسبة للأمهات الجدد.

      تعليق

      مواضيع ذات صلة

      تقليص

      المواضيع إحصائيات آخر مشاركة
      ابتدأ بواسطة د تيماء, منذ أسبوع واحد
      ردود 0
      14 مشاهدات
      0 معجبون
      آخر مشاركة د تيماء
      بواسطة د تيماء
       
      ابتدأ بواسطة د تيماء, 12 فبر, 2024, 07:30 م
      ردود 0
      17 مشاهدات
      0 معجبون
      آخر مشاركة د تيماء
      بواسطة د تيماء
       
      ابتدأ بواسطة *اسلامي عزي*, 24 ينا, 2024, 12:01 ص
      ردود 0
      6 مشاهدات
      0 معجبون
      آخر مشاركة *اسلامي عزي*
      بواسطة *اسلامي عزي*
       
      ابتدأ بواسطة *اسلامي عزي*, 24 ينا, 2024, 12:00 ص
      ردود 0
      2 مشاهدات
      0 معجبون
      آخر مشاركة *اسلامي عزي*
      بواسطة *اسلامي عزي*
       
      ابتدأ بواسطة *اسلامي عزي*, 12 سبت, 2023, 02:05 ص
      ردود 0
      9 مشاهدات
      0 معجبون
      آخر مشاركة *اسلامي عزي*
      بواسطة *اسلامي عزي*
       
      يعمل...
      X