تويت
الحملة الشعبية لإبادة التدخين (أنا أو السيجارة)
بسم الله الرحمن الرحيم
--------------
الموضوع التالي منقول من مدونتي الخاصة
يوميات دكتور مخنوق
الموضوع يتحدث عن التدخين وفيه أخير أصدقائي المدخنين بين صداقتي والإستمرار فيها ، وبين الإستمرار في التدخين لأن كافة السبل الأخرى لم تأتي بفائدة معهم عملاً بالقاعدة النفسية التي تقول أن أفضل طريقة للخروج من أزمة هي الصدمة
وبحمد الله قرر معظم أصدقائي الإقلاع عن التدخين بالطبع ليس من أجلي ، ولكن موضوعي كان بمثابة المحفز لهم
أترككم مع الموضوع وأعتذر عن طوله
----------------------------------------------
يا أنا يا السيجارة في قلب العمارة
--------------
الموضوع التالي منقول من مدونتي الخاصة
يوميات دكتور مخنوق
الموضوع يتحدث عن التدخين وفيه أخير أصدقائي المدخنين بين صداقتي والإستمرار فيها ، وبين الإستمرار في التدخين لأن كافة السبل الأخرى لم تأتي بفائدة معهم عملاً بالقاعدة النفسية التي تقول أن أفضل طريقة للخروج من أزمة هي الصدمة
وبحمد الله قرر معظم أصدقائي الإقلاع عن التدخين بالطبع ليس من أجلي ، ولكن موضوعي كان بمثابة المحفز لهم
أترككم مع الموضوع وأعتذر عن طوله
----------------------------------------------
يا أنا يا السيجارة في قلب العمارة
قرار جمهوري بمقاطعة كافة المدخنين مهما كانت العلاقة معهم ، ويكتفى فقط بالسلام من بعيد وعدم الوقوف معهم نهائياً
» ده القرار اللي قررته خلاص بعد ما فاض بيا ومليت وزهقت من موضوع التدخين والمدخنين .. ناس كتير قوي حتزعل من قراري ده ، وناس تانيين برضه حيوافقوني عليه ، وفيه اللي حيقترح تعديلات عليه .. وعلشان كده قررت إني أكتب الموضوع ده علشان نتناقش ونقرر الأصح والأنسب لينا إحنا غير المدخنين
» طبعاً في البداية لازم أوضح سبب القرار الغريب ده .. معظمكم عارفين إن والدي تعبان ، والمفروض يتم توفير كل الظروف لراحة المريض وإحنا مش مقصرين في حاجة والحمد لله .. بس لما يكون المريض نفسه مش عاوز يساعد نفسه يبقى لأ بقى كفاية بجد .. والدي مدخن من زمااااااااااااااان قوي وكان معدل تدخينه حوالي علبة في اليوم (20 سيجارة) بس بعد التعب المعدل زاد ووصل أحياناً لحوالي علبتين وتلاتة في اليوم (40-60 سيجارة) وحاولت معاه كتير قوي ولكن لا حياة لمن تنادي .. وطبعاً التدخين مأثر على حالته الصحية بس هو بيعاند وبيقولي ماهو من تعبي بأشربها !! يعني هي اللي بتريحه ولا بتسكن الألم ؟!!
» بأكون مخنوق جداً لما يكون بينام وماسك السيجارة في إيده ومش راضي يسيبها لدرجة إنها ساعات بتقع منه وتحرق السرير أو هدومه !! بقى للدرجة دي مش قادر يبطل التدخين .. لأ بقى أنا بجد جبت آخري من التدخين والمدخنين وعلشان كده كان قراري اللي فات وتابع الموضوع علشان يا تقنعني يامدخن ياصاحبي وأخويا وحبيبي ، يا إما أقنعك أنا
» إسمحلي أسألك إنت ليه بتدخن ؟!! حتقولي بأطلع زهقي في السيجارة ، أصلها بتريحني وتخليني أعرف أركز ، بتعملي دماغ عالية .. أظن مفيش ردود تانية عندك ولا فيه وأنا مش عارف ؟ خلينا نرجع كده لأول مرة مسكت فيها السيجارة ، فاكر ولا تحب أفكرك .. كنت لسه عيل صغير لا بتعرف تفكر ولا تقرر الصح من الغلط ، شفت الرجالة الكبار إن كان والدك ولا أستاذك ولا عمك ولا أي حد كبير ماسك السيجارة وبيشربها ، وتقليداً لهم وعلشان تحس إنك راجل قررت تشرب سجاير .. يعني الموضوع بدأ معاك بعقدة نقص وتقليد أعمى للغير
» طب فاكر أول نفس سحبته من السيجارة ؟!! قعدت تكح وعينيك بقت زي الدم وكإن روحك كانت حتطلع ، والدخان طالع علي عينيك وبتدمع زي ما يكون واحد من أهلك مات .. يعني من أولها كانت وحشة وزي الزفت وكلها عيوب ، يبقى ليه صممت إنك تكمل وتشربها ؟!! أقولك ليه .. إنك شفت اللي أكبر منك أو اللي في سنك بيدخن بيشربها ومش بيحصله كل ده ، فقلت ليه مش أبقى زيه كده وساعتها بس حأكون راجل خاصة إنهم كانوا بيضحكوا على منظرك وإنت مدمع .. يعني برضه عقدة نقص وقلة عزيمة
» طب فاكر كنت بتشرب السجاير فين ؟!! كنت ساعتها غالباً لسه عيل ومش تقدر تشربها في مكان عام ألا أبوك أو أمك يشوفوك أو أي حد معرفه يشوفك ويبلغهم وتبقى مصيبة ، وبالتالي كنت بتشربها في مكان ماحدش يشوفك فيه .. غالباً بيكون الحمام سواء في البيت بس طبعاً بعد ما تخلصها بتبخر الحمام علشان الريحة بتاعة السجاير ، أو في حمام المدرسة ، أو تروح لمكان بعيد في آخر البلد أو المدينة على أطرافها تشرب إنت واللي زيك ويبقى ماحدش شافكم ، وغالباً برضه بتزوغ من المدرسة أو الدروس علشان تشرب سجاير .. طب ليه صممت تعمل حاجة خايف من إن الناس تعرفها ؟!!
» طب لما كنت بتخلص السيجارة كنت بتعمل إيه ؟!! أقولك أنا كنت بتعمل إيه .. كنت بتاكل لبان أو أي حاجة علشان تضيع بيها ريحة السجاير من فمك ، وتفضل تقول للي معاك شم كده ، لسه فيه ريحة ولا خلاص راحت !! وكمان كنت بتحاول تضيع الريحة من إيديك ومن هدومك لإن دخان السجاير بيلزق في أي مكان وبتفضح اللي شربها .. وتبقى ليلة سودة لو حد في البيت شم ريحة سجاير وسألك عليها بتبقى زي البتاع المبلول مش عارف تقول إيه ولا تعمل إيه وتخترع أي حجة هبلة تبرر بيها الموضوع .. برضه خايف من اللي بتعمله ومصمم عليه !!
» طب مفيش مرة كده عرفوا في البيت إنك بتشرب سجاير ؟!! غالباً عرفوا ، وكانت النتيجة إما علقة من إيد ست الحبايب أو من إيد السيد الوالد .. علقة ما أكلهاش حمار في منزل ، وغالباً بيصاحبها شوية شتيمة كتحابيش للعلقة زي السلاطات مع الكباب كده بالظبط .. وبرضه غالباً بيتمنع عنك المصروف وساعات بتوصل للحبس في البيت وممنوع الخروج نهائياً .. وتضطر تستلف من أصحابك علشان تشتري سجاير اللي هي أصلاً سبب مشاكلك دي .. طب ليه برضه صممت إنك تشربها ؟!!
» طب إنت عمرك قرأت اللي مكتوب على علبة السجاير ؟!! طبعاً لأ حتقرأها إزاي وإنت آخرك ساعتها كام سيجارة فرط بربع جنيه وعمرك ما جبت علبة كاملة ، ولو حصل وجبت علبة كاملة بتعمل فرح 7 أيام بلياليهم ، وبتبقى مش عارف تخبيها فين ولا فين وحاسس إن كل الأماكن مكشوفة للي معاك في البيت .. طب لو عرفت ساعتها إن مكتوب على العلبة (التدخين ضار بالصحة ويسبب الوفاة) ولو عرفت إن مكتوب عليها دلوقت (إحترس التدخين يدمر الصحة ويسبب الوفاة ، والآثار المدمرة للتدخين تصيب المدخن وغير المدخن) ومن على الضهر مكتوب (سرطان الرئة بسبب التدخين) مع صورة لرئة أسدو من الليل .. ياترى كنت لسه حتشربها برضه ؟!!
» طب مفيش مرة شفت واحد قريبكم أو معرفة صدره تعبان وعمال يكح ليل نهار ، والبلغم مبهدله ومش عارف ياخد نفسه ، أو دخل مستشفى الصدر في مرة بسبب التدخين ؟!! طب مشفتش موضوعات في التليفزيون عن التدخين وبلاويه ومصايبه اللي مالهاش أول من آخر ؟!! طب عمرك ما قرأت في الجورنال مقال عن أضرار التدخين ولا خبر عن قضايا مرفوعة على شركات التبغ بسبب أضرار التدخين ؟!! طب مفيش مرة حد أكبر منك ومدخن برضه قالك دعالك وقالك ربنا يبعدك ويحميك من التدخين ؟!! مش معقولة ماحصلش معاك أي موقف من دول ، وممكن يكونوا حصلوا معاك كلهم .. بس ليه برضه صممت على التدخين ؟!!
» طب كنت بتشرب كام سيجارة في اليوم في البداية ؟!! أظن كانوا التلات سجاير اللي كانوا بربع جنيه بيكفوك اليوم كله وزيادة كمان .. بس شوية بشوية المعدل زاد وبقيت بتشرب 4 سجاير في اليوم ، شوية وصلوا 6 سجاير في اليوم ، وصلوا دلوقتي 10 سجاير .. ربنا كرمك ووصلوا معاك لعلبة في اليوم (20 سيجارة) ، وأحياناً ناس بتشرب علبتين وتلاتة في اليوم (40-60 سيجارة) .. طب ما سألتش نفسك ليه المعدل بيزيد على طول مش بيقل أبداً ؟!! وطبعاً التكلفة بتزيد مع المعدل والصحة بتنزل !!
» تسمحلي أزل عليك وأسألك بتشرب سجاير نوعها إيه ؟!! مصري ولا مستور ؟!! منكم ياأصحابي وإخواتي وحبايبي اللي بيشرب مصري اللي العلبة منها بحوالي 2.5 جنيه .. ومنكم اللي بيشرب مستورد وبتبدأ العلبة من أول 4.5 جنيه لحد 7.5 جنيه وأحياناً أغلى من كده كمان (سامحوني ألا انا مش خبرة في الحاجات دي يعني) .. طب يعني أقل واحد فيكم بيصرف 2.5 جنيه يومياً على السجاير بس وهو لسه مجرد طالب بياخد مصروفه من أبوه كل يوم الصبح ، وبيستخسر ياكل أو يفطر علشان يجيب سجاير يدخنها !! بقى ده إسمه كلام ، ولسه مصمم تشربها ؟!!
» طب إنت دلوقت وإنت بغل (آسف في اللفظ بس لازم) لسه منكم بيخاف إن أهله يعرفوا إنه بيدخن !! بقى إنت بغل كده وزي الجدار وبتاكل زي التور ولسه بتخاف إنهم يعرفوا إنك بتدخن ؟!! حتقولي مش خايف بس إحتراماً ليهم والكلام الأهبل والعبيط ده ، حأقولك بتضحك على نفسك ولا عليا ولا على مين ؟!! أنا عارف ومتأكد إنك خايف إنهم يعرفوا .. الخوف اللي لازمك من أول ما بدأت التدخين من كذا سنة .. عقدة وإتربت جواك ومحتاج مجهود جبار علشان تتخلص منها .. آسف ياصاحبي بس إنت جبان
» طب إنت دلوقت عارف إن التدخين مضر جداً بالصحة ويسبب الوفاة وسرطان الرئة ، وعارف كمان إن التدخين بيضر المدخن وغير المدخن على حد السواء ، بل إن التدخين السلبي (غير المدخنين) بيكون ضرره أكبر بنسبة 17% .. يعني عارف إنك بتضر نفسك وبتضرني معاك في نفس الوقت !! ولسه برده مصمم تدخن ؟!! هو إنتي مش بتعتبرني صاحبك وأخوك وحبيبك زي ما أنا بعتبرك كده ولا إيه ؟!! ماتقوليش لأ بحبك وبأخاف عليك لإني مش حصدقك ، لإنك لو بتخاف عليا فعلاً كنت أبعدت الضرر عني ، مش تكون إنت السبب فيه !!
» طب وإنت يا صاحبي وزميلي اللي معايا في كليتي ، كلية الطب ، وأكتر واحد عارف أضرار التدخين إيه على كل أجهزة الجسم مش مجرد الجهاز التنفسي زي ما معظم الناس عارفين ، وعارف كمان إنه أحد العوامل المساعدة على الإصابة بآلاف الأمراض بداية من الربو ، مروراً بالذبحات الصدرية ، وليس آخرها السرطانات وخاصة سرطان الرئة .. وعارف إن اللي بطل التدخين بيكون عرضة للإصابة بسرطان الرئة لمدة 5 سنين بعد التوقف ، فما بالك باللي لسه مستمر في التدخين ؟!! عارف كل ده ولسه برضه بتدخن يادكتور ياصاحبي وأخويا وحبيبي ، ياللي بكرة تنصح المريض إنه يبطل تدخين علشان صحته !! طب إزاي أقبل نصيحة من واحد هو مش بيعمل بيها أصلاً ، وفاقد الشئ لا يعطيه
» طب إنت عارف المقولة الشهيرة اللي بتقول إن السجاير هي الخطوة الاولى للإدمان .. حتقولي بس أنا مش مدمن ، حأقولك كداب .. طالما مش عارف تبطل السجاير وبتشربها لا إرادياً تبقى إدمان .. وبكرة أو في يوم من الأيام ممكن تنتقل للخطوة اللي بعدها في سلم الإدمان لما تلاقي إن السجاير مش بتحطك في المود اللي إتعودت عليه ، وبالتالي تشرب بانجو ، فحشيش ، تتطور شوية وتبدأ تشم كوكايين ، وتاخد الدكتوراة في المخدرات بقى لما تشم هيروين وبكده أقولك مبروك عليك شهادة وفاتك بإيديك
» طب لما ربنا يكرمك وتتجوز ومراتك تكون حامل في إبنك ، حتشرب برضه سجاير وتدخن ؟!! إنت مش عارف إن التدخين غلط على الحامل وممكن يسبب مشاكل ليها وللجنين على حد السواء ؟!! طب ولما ربنا يكرمك وتشوف إبنك قدامك حتدخن برضه ؟!! إبنك الصغير اللي لسه يادوب بيتعرف على الدنيا وأي حاجة تأثر فيه ، حتدخن وتضره بدخانك وتكون سبب في تدميره من صغره ؟!! ما تحاولش تقنع نفسك إنك مش ممكن أبداً تضره ، لإني مش حصدقك لإنك بتناقض الواقع وبتناقض نفسك اللي متأكدة إنك بتضر نفسك وبتضرهم !!
» وبيتك وأولادك اللي محتاجين كل قرش ومصاريف مالهاش أول من آخر ، حتضيع برضه فلوسك على السجاير وقتها ؟!! حتقولي دول 2.5 جنيه في اليوم بس ، حأقولك إحنا في زمن محتاجين فيه كل قرش وماحدش ضامن الزمن حيبقى عامل إزاي ولو وفرتهم لإبنك حيشكرك بعد كده ويشيل جميلك على راسه من فوق ويدعيلك حي وميت .. لسه برضه مصمم على التدخين ؟!!
» طب إنت مش عارف إن التدخين حرام شرعاً بإجماع كافة العلماء عملاً بقول الله تعالى في محكم التنزيل (وَأَنفِقُواْ فِي سَبِيلِ اللّهِ وَلاَ تُلْقُواْ بِأَيْدِيكُمْ إِلَى التَّهْلُكَةِ وَأَحْسِنُوَاْ إِنَّ اللّهَ يُحِبُّ الْمُحْسِنِينَ) [البقرة : 195] .. بقى تمتنع عن باقي المحرمات والمعاصي وتتمسك بالسيجارة اللي ممكن تكون سبب في عذابك لما تدمر نفسك وبيتك وأهلك وكل اللي بتحبهم ؟!! ما سمعتش حديث سيد ولد آدم رسول الله (صلوات ربي وسلامه عليه) [لا تزول قدما عبد حتى يسأل عن عمره فيما أفناه ، وعن علمه فيما فعل ، وعن ماله من أين اكتسبه وفيما أنفقه ، وعن جسمه فيما أبلاه]
الراوي: أبو برزة الأسلمي - خلاصة الدرجة: حسن صحيح - المحدث: الترمذي - المصدر: سنن الترمذي - الصفحة أو الرقم: 2417
الراوي: أبو برزة الأسلمي - خلاصة الدرجة: حسن صحيح - المحدث: الترمذي - المصدر: سنن الترمذي - الصفحة أو الرقم: 2417
» طب تعرف إن في أمريكا في بعض البلدات هناك ممنوع التدخين في أي مكان عام وحتى في البيت ، واللي عاوز يدخن في أماكن محددة واللي يخالف القرار ده يتعرض لمخالفة وغرامة .. وفي المطاعم والمحلات في أوروبا وأمريكا طبقت قرارات منع التدخين داخل هذا الأماكن ومن يخالفها يتعرض لغرامة فورية .. وممنوع التدخين في داخل المصالح الحكومية وهو القرار اللي إتطبق أخيراً في مصر ولكن كالعادة على الورق بس مش أكتر .. والغريب إن حكومتنا المصونة بتدعم السجاير بمليارات كل سنة وعاوزة ترفع الدعم عن السلع الأساسية ؟!!
» ياصاحبي وأخويا وحبيبي وأقرب ليا من نفسي أنا عاوز مصلحتك بجد .. أنا مش طالب منك منفعة ولا مصلحة دنيوية ولا عاوز منك أي حاجة ، أنا عاوز بس أشوفك كلك صحة وسعادة وفي خير .. مش عاوز بعد كده أشوفك بتتألم لما المرض يمسكك بسبب التدخين وتأكد ساعتها إن ألمي حيكون أكتر من ألمك بكتير قوي ، لإني حأكون عاجز عن تقديم المساعدة ليك وحأندم ألف مرة في اليوم إني مش منعتك من التدخين من صغرك وحميتك من نفسك
» إنت زعلان مني علشان القرار بتاعي ده ؟!! زعلان إني مش حأقف معاك ولا نتكلم زي الأول ؟!! زعلان إني مش حأشكيلك همي وإنتي تفضفضلي عن اللي جواك وننصح بعض ؟!! متضايق إن حيبقى كلامنا مجرد سلام من بعيد لبعيد وتضيع الأيام الحلوة ؟!! .. طب لما إنت زعلان قوي كده ليه زعلتني أنا وجرحتني .. أيوه جرحتني لما خيرتك بيني وبين السيجارة وفضلتها عليا وضحيت بصداقتي علشانها .. حتقولي طب مش أدخن قدامك ولا معاك ، حأقولك لسه برضه المشكلة زي ماهي وبكده بنضحك على نفسنا مش أكتر ، لإنك لسه حيكون بتدمر نفسك وأنا مش قادر أمنعك
» ياصاحبي وأخويا وحبيبي إما إني فعلاً أنقذك من اللي إنت فيه ومن تدميرك لنفسك ، أو إني أبعد علشان مش أشوفك وإنت بتتعذب بعد كده ، بس تأكد إن ساعتها حتندم ألف مرة إنك فضلتها عليا لما تكون في أشد الإحتياج لصديقك وإنت بغبائك بعدته عنك !!
» بتقولي دلوقت عاوز تبطلها بس مش عارف ، وكل مرة ترجع ليها ، أو حتقولي حأبطلها بإذن الله بس إدعيلي أو لما ربنا يريد !! إنت لسه مصمم تضحك على نفسك برضه وتخدعها لحد ما تقع الكارثة ؟!! ربنا قال إسعى ياعبد وأنا أسعى معاك ، مش كفاية بس تكون عندك النية إنك تبطلها ، لأ لازم تكون نية تصاحبها عمل وفعل .. من النهاردة وقفها نهائياً وأنا معاك وجنبك حأساعدك في أي وقت وفي أي مكان .. كل ما تحس إنك عاوز تشربها تاني كلمني ، إبعتلي رسالة وحتلاقيني معاك وجنبك لو في نص الليل .. أوعدك إني مش حأتأخر عنك أبداً ساعتها لإنك فضلتني عليها ويبقى حقك عليا إني أكون جنبك في أي وقت وأي مكان
» مش تلومني على قراري وتجيب الغلط كله عليا .. لأ شوف أنا قراري ده إتخذته ليه وحتعرف إن اللي ماسكها في إيدك دي هي السبب ، وسهل قوي إنك تحطمها قبل ما تحطمك .. حتتعب شوية بس بعدها حتستريح وتحس بالفرق ، وزي ما بيقول المثل (تعب ساعة ولا كل ساعة) .. وإبدأ معايا من دلوقت ، جرب إسبوع واحد بدون تدخين وحتحس بالفرق لما صدرك يبدأ ينضف وتحس بالنشاط والحيوية وإن نفسك وقلبك بدأ ينتظم بعد ما الحمل اللي عليه قل
» بس لو إخترتها هي ياصاحبي وأخويا وحبيبي ، ساعتها ما تزعلش مني ولا من تصرفاتي لإني مش أفضل واحد فضلني على أحقر ما صنع الإنسان .. ساعتها ما تلومش إلا نفسك على سوء إختيارها ومش تقولي بإستعجاب إنت حتغير الكون ، حقولك لأ بس حأحاول أغير اللي معايا على قد ما أقدر للأحسن علشان نفسهم قبل كل شئ
———————————————————————-
في النهاية ياصاحبي وأخويا وحبيبي القرار ليك إنت لوحدك ، فكر وقرر مين تختار
أنـا أو السيجارة
تعليق